დე ფაქტო რეჟიმის ე.წ. სასამართლოს მიერ, დღეს მიღებულ გადაწყვეტილებას, ექიმ ვაჟა გაფრინდაშვილისთვის პატიმრობის შეფარდების შესახებ, საქართველოს ადვოკტთა ასოციაციის თავმჯდომარე, დავით ასათიანი სოციალურ ქსელ facebook-ში გამოეხმაურა.

„ცხინვალის რეჟიმმა ვაჟა გაფრინდაშვილი დასაჯა თავისი პრინციპული და პატრიოტული პოზიციისათვის - 1 წელი და 9 თვე, ექიმის გათავისუფლებისათვის ბრძოლა გრძელდება“, - წერს ასათიანი facebook-ზე.

დე ფაქტო ხელისუფლებამ, ვაჟა გაფრინდაშვილს ე.წ. სახელმწიფო საზღვრის განზრახ დარღვევის ბრალდება რუსეთის სისხლის სამართლის კოდექსის 322-ე მუხლით წაუყენა, რომელიც 200 000 რუბლით დაჯარიმებას, ორ წლამდე იძულებით სამუშაოებს, ან ორ წლამდე თავისუფლების აღკვეთას ითვალისწინებს. დღეს კი, ცხინვალის დე ფაქტო სასამართლოს გადაწყვეტილებით, ექიმ-ტრავმატოლოგს 1 წლით და 9 თვით პატიმრობა შეეფარდა.