ფესტივალის ერთ-ერთი გამორჩეული ნაწილი იქნება უნიკალური გამოფენა, სადაც პირველადერთიან სივრცეში იქნება წარმოდგენილი სამღვდელმთავრო, სამეფო და საერო ისტორიული სამოსი. გათვალისწინებულია, პროგრამაში ბაგრატიონთა სამეფო გვარის შთამომავლების მონაწილეობაც.

უფლისციხის საგამოფენო სივრცეში ასევე მოეწყობა ქართული ტრადიციული რეწვის გამოფენა-გაყიდვა, ხელსაქმისა და კულტურული მემკვიდრეობის მასტერკლასები, ქართული პურისა და ღვინის კულტურის წარმოჩენა, ეთნოკულინარიული პროგრამა ადგილობრივი და მოწვეული საქართველოს სხვადასხვა კუთხიდან. წელს პირველად ეთნოფესტივალს სტუმრობენ ინგუში ტრადიციული რეწვის ოსტატები. მეწარმეებისა და მარნების მონაწილეობით.

ცალკე მიმართულება დაეთმობა ეთნოსპორტსა და ქართულ ტრადიციულ თამაშობებს, ასევე ჭადრაკის ბლიც-ტურნირს. ფესტივალის საკონცერტო პროგრამის ფინალში ქართული ფოლკლორის, ქორეოგრაფიისა და საგალობლის წარმომადგენლები გაერთიანდებიან გალა-კონცერტში. ფესტივალის დასასრულს გაიმართება მონაწილეთა დაჯილდოების ცერემონია, სადაც წარდგენილნი იქნებიან კულტურის სფეროს წარმომადგენლები და მონაწილე ანსამბლების ხელმძღვანელები.

ღონისძიების დასრულების სიმბოლური კულმინაცია იქნება, ქართული კულტურული და სულიერი მემკვიდრეობის უწყვეტობის სიმბოლო, ანთებული ჩირაღდნის საზეიმო გადაცემა, რომელიც ყოველწლიურად გადაეცემა მომავალი ფესტივალის მასპინძელ რეგიონს. პროექტი მიზნად ისახავს ეროვნული კულტურული მემკვიდრეობის პოპულარიზაციას, ეკლესიის, ადგილობრივი თვითმმართველობისა და საზოგადოების თანამშრომლობის გაძლიერებას, რეგიონული ტურიზმის განვითარებას, ადგილობრივი მეწარმეობის მხარდაჭერას, ახალგაზრდებში ეროვნული ღირებულებების განმტკიცებასა და საქართველოს კულტურული მემკვიდრეობის საერთაშორისო სივრცეში წარმოჩენას.

„ეთნოფესტივალი საქართველოში უფლისციხე 2026“ არის წარსულის, აწმყოსა და მომავლის დამაკავშირებელი კულტურული სივრცე ქართული ტრადიციის, ქრისტიანული მემკვიდრეობისა და ეროვნული ერთიანობის საფუძველზე.“ - აღნიშნულია ინფორმაციაში, რომელსაც ეთნოფესტივალის ორგანიზატორები ავრცელებენ.