მოსწავლეთა შემოქმედებითი ფანტაზიის სტიმულირების, შრომითი ჩვევების დანერგვის, მხატვრული და ესთეტიკური გემოვნების განვითარების მიზნით, გორის მუნიციპალიტეტის სკოლების მონაწილეობით, ხელნაკეთი ნივთების გამოფენა-კონკურსი გაიმართა.

ღონისძიება გორის კულტურისა და ახალგაზრდობის განყოფილების ინიციატივით  ჩატარდა, რომელშიც მონაწილეობა გორის მუნიციპალიტეტის სკოლების მე-5 და მე-12 კლასის მოსწავლეებმა მიიღეს.

კომპეტენტურმა ჟიურიმ სამი გამარჯვებული, ორიგინალური ნამუშევარი და ჟიურის სიმპათია გამოავლინა.

რაც შეეხება გამარჯვებულებს, პირველი ადგილი პატარა გარეჯვარის საჯარო სკოლამ დაიკავა, მეორე - კარალეთის N2 საჯარო სკოლამ, მესამე - ბერბუკის საჯარო სკოლამ.

ნომინაცია - ორიგინალური ნამუშევარი - რეხის საჯარო სკოლას ხვდა წილად, ხოლო ჟიურის სიმპათია N9 საჯარო სკოლა გახდა.

ყველა მონაწილეს გორის მუნიციპალიტეტის კულტურის განვითარების  ხელშეწყობის სააგენტოს სიგელები, გამარჯვებულებს კი ფასიანი საჩუქრები გადაეცა.