გორში, საზოგადოებრივი ტრანსპორტით მგზავრობის საფასურის გადახდა „საქართველოს ბანკის“ პლასტიკური ბარათებით უკვე შესაძლებელია, - ინფორმაციას აღნიშნულის შესახებ გორის მუნიციპალიტეტის ტრანსპორტის სააგენტო ავრცელებს.

ტრანსპორტის სააგენტოს ინფორმაციით, გორში, საზოგადოებრივი ტრანსპორტით მგზავრობის საფასურის გადახდა ახლა უკვე - გორის სატრანსპორტო ბარათით, „თიბისი ბანკის“ პლასტიკური ბარათებით და „საქართველოს ბანკის“ პლასტიკური ბარათებითაა („AMEX“ ბარათის გარდა) შესაძლებელი.

შეგახსენებთ, გორში, მუნიციპალური ტრანსპორტი 2021 წლის 8 თებერვლიდან მოძრაობს. თანამედროვე, უსაფრთხო და კომფორტული ტრანსპორტი აკმაყოფილებს თანამედროვე სტანდარტის ყველა ტექნიკურ მოთხოვნას, აღჭურვილია ევროსტანდარტების შესაბამისი ვენტილაციის სისტემით და სრულად ადაპტირებულია შეზღუდული შესაძლებლობების მქონე პირებისთვის.