დღეს, 25 ივლისს, აბიტურიენტები გამოცდას ქართულ ლიტერატურაში აბარებენ. როგორც „გორის მაცნესთან“ საგამოცდო ცენტრის ადმინისტრატორმა თინათინ გვერდწითელმა განაცხადა, რეგისტრირებული 125 აბიტურიენტიდან გამოცდაზე 120 აპლიკანტი გამოცხადდა.

„დღევანდელ გამოცდაზე რეგისტრირებული 125 აბიტურიენტიდან საგამოცდო ცენტრში 5 არ გამოცხადდა. რაც შეეხება საგამოცდო პროცესს, მშვიდ ვითარებაში მიმდინარეობს. დაგვიანების შემთხვევები არ გვქონია.

დღეს სასიხარულო და ორიგინალური შემთხვევა გვაქვს საგამოცდო ცენტრში: ფეხმძიმე ქალბატონი გამოცდიდან პირდაპირ სამშობიაროში გავაცილეთ“, - აღნიშნა გვერდწითელმა.

ცნობისთვის, ერთიანი ეროვნული გამოცდები აბიტურიენტებისთვის ხვალ, 26 ივლისს, ფიზიკის გამოცდით დასრულდება. 27 ივლისიდან კი, საგამოცდო პროცესში მაგისტრანტობის მსურველები ჩაერთვებიან.