საქართველოს ეროვნული თავდაცვის აკადემიის ტერიტორიაზე დავით აღმაშენებლის სახელობის ტაძარი გაიხსნა.

ტაძრის გახსნას თავდაცვის მინისტრი ჯუანშერ ბურჭულაძე, თავდაცვის უწყების და ეროვნული თავდაცვის აკადემიის ხელმძღვანელები დაესწრნენ. ახლადამოქმედებული ტაძარი გორისა და ატენის ეპარქიის მმართველმა, მიტროპოლიტმა ანდრიამ (გვაზავა) აკურთხა.

„დავით აღმაშენებლის სახელობის ეროვნული თავდაცვის აკადემიაში წმინდა მეფის სახელობის ტაძარი საქართველოს თავდაცვის სამინისტროსა და ეროვნული თავდაცვის აკადემიის ერთობლივი ინიციატივითა და ძალისხმევით, ასევე პირადი შემადგენლობის ჩართულობით აშენდა.

მინისტრი აკადემიის ტერიტორიაზე მიმდინარე ინფრასტრუქტურულ სამუშაოებსაც გაეცნო. უწყების ხელმძღვანელმა დაათვალიერა სასადილო, სადაც კაპიტალური სარემონტო-სარეაბილიტაციო სამუშაოები დასკვნით ეტაპზეა,“ - აღნიშნულია ინფორმაციაში, რომელსაც თავდაცვის სამინისტრო ავრცელებს.