სოციალური დახმარების პროგრამის ფარგლებში, გორის მუნიციპალიტეტის მერია ოლიმპიურ სახეობებში მოასპარეზე საქართველოს ნაკრების სოციალურად დაუცველ (ქულა: 0-დან 120 000-ის ჩათვლით) წევრებს წელიწადში ერთხელ 500 ლარით დაეხმარება.

როგორც ადგილობრივ თვითმმართველობაში აცხადებენ, დახმარების მისაღებად ბენეფიციარმა ან/და მისი ოჯახის უფლებამოსილმა წარმომადგენელმა გორის მუნიციპალიტეტში უნდა წარმოადგინოს შემდეგი სახის დოკუმენტაცია: განცხადება მერის სახელზე; ცნობა შესაბამისი ფედერაციიდან ეროვნული ნაკრების წევრობის შესახებ; პირადობის დამადასტურებელი მოწმობა; სოციალურად დაუცველი ოჯახების მონაცემთა ერთიან ბაზაში რეგისტრაციის ამონაწერი, რომელშიც მუდმივ საცხოვრებელ ადგილად მითითებული იქნება გორის მუნიციპალიტეტის ტერიტორია.