საერთაშორისო მნიშვნელობის თბილისი-სენაკი-ლესელიძის საავტომობილო გზის გორი-თბილისის მონაკვეთზე გარე განათების ქსელის მოწყობის სამუშაოები მიმდინარეობს.

საავტომობილო გზების დეპარტამენტის ინფორმაციით, პროექტის ღირებულება 6 მლნ. ლარამდეა და მისი დასრულება წლის ბოლომდე იგეგმება.

„საქართველოს მთავრობის „საგზაო უსაფრთხოების 2022-2023 წლების სამოქმედო გეგმის“ მიხედვით, საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის მთავარი ამოცანა საგზაო ინფრასტრუქტურის უსაფრთხოების ხარისხის გაუმჯობესებაა“, - ნათქვამია უწყების მიერ გავრცელებულ ინფორმაციაში.

პროექტის ფარგლებში, საავტომობილო გზის ქსელზე დაახლოებით 80 000 გრძივი მეტრი სიგრძის EN 1317 ევროპული ნორმების შესაბამისად ლითონის მრუდხაზოვანი ძელების კონსტრუქციაც ეწყობა.

ცნობისთვის, აღნიშნული 2 პროექტის ჯამური სახელშეკრულებო ღირებულება 19 მლნ. ლარამდეა და მათი დასრულება 2022 წლის დეკემბერშია დაგეგმილი.