გორის მუნიციპალიტეტში, ძევერა-შერთულის სარწყავი სისტემის მოწესრიგების სამუშაოები აქტიურად მიმდინარეობს. პროექტს გარემოს დაცვისა და სოფლის მეურნეობის სამინისტროს შპს „საქართველოს მელიორაცია“ ახორციელებს.

როგორც უწყებაში განმარტავენ, ამ ეტაპზე, დანალექი გრუნტისა და მცენარეული საფარისაგან მაგისტრალური არხის ერთ-ერთი წყალგამანაწილებლის 3 კილომეტრიანი მონაკვეთი იწმინდება.

„გატარებული ღონისძიებების შედეგად, არხში წყლის გამტარუნარიანობა გაიზრდება, რის შემდეგაც სარწყავი წყლის მიწოდების რეჟიმი 650 ჰექტარ სასოფლო-სამეურნეო მიწის ფართობზე გაუმჯობესდება. ამასთან, აღდგენილი საირიგაციო სისტემით გორის მუნიციპალიტეტის 4 სოფლის - ძევერა, შერთული, კარალეთი, გარეჯვარი -  მოსახლეობა ისარგებლებს“, - ნათქვამია გარემოს დაცვისა და სოფლის მეურნეობის სამინისტროს მიერ გავრცელებულ ინფორმაციაში.