
გორში, მუნიციპალიტეტის სკოლების გუნდების მონაწილეობით, შიდა ქართლის რეგიონული ინტელექტჩემპიონატის შესარჩევი ტური ჩატარდება.
ღონისძიებას გორის სპორტის სასახლე ხვალ, 17 ნოემბერს უმასპინძლებს და ადგილობრივი თვითმმართველობის ინფორმაციით, შეჯიბრება ორ ასაკობრივ კატეგორიაში - უმცროსი (VIII-IX კლასები) და უფროსი (X-XI კლასები) ასაკის მოსწავლეებს შორის გაიმართება.
„გორის მუნიციპალიტეტის სკოლებს შორის ჩემპიონატის შესარჩევი ტური 11:00 საათზე დაიწყება. შედეგად, თითოეულ ასაკობრივ კატეგორიაში 5 საუკეთესო გუნდი გამოვლინდება, რომლებიც შიდა ქართლის რეგიონულ ჩემპიონატში მიიღებენ მონაწილეობას.
ინტელექტჩემპიონატი გორის მუნიციპალიტეტის მერიის მხარდაჭერით ტარდება და გულშემატკივართა დასწრება თავისუფალია“, - აცხადებენ გორის მერიაში.
შეგახსენებთ, გორის მუნიციპალიტეტის სკოლების მონაწილეობით მაისში გამართულ ინტელექტჩემპიონატის გამარჯვებული ოლეგ ჭონიშვილის სახელობის გორის მუნიციპალიტეტის სოფელ ბეთლემის სკოლის გუნდი გახდა; II ადგილი - ნიკოლოზ (ნიკო) კეცხოველის სახელობის გორის №1; ხოლო III ადგილი გორის მუნიციპალიტეტის სოფელ პატარა გარეჯვრის საჯარო სკოლების გუნდებმა (VIII-IX კლასები) დაიკავეს.
უფროსი ასაკობრივი კატეგორიის (X-XI კლასები) გამარჯვებული კი გორის მუნიციპალიტეტის სოფელ ტყვიავის საჯარო სკოლა გახდა; II ადგილი - გორის №2 საჯარო სკოლამ დაიკავა; III ადგილზე ღირსი მამა გიორგი მთაწმინდელის გორის სკოლა-გიმნაზია გავიდა.