დევნილთა, შრომის, ჯანმრთელობისა და სოციალური დაცვის სამინისტროს და დაავადებათა კონტროლისა და საზოგადოებრივი ჯანმრთელობის ეროვნული ცენტრის ორგანიზებით, გორში მასშტაბური სკრინინგ აქცია ჩატარდება.

12 ნოემბერს, გორის საზოგადოებრივი ჯანდაცვის ცენტრში (სტალინის ქ. №2) მოქალაქეები კვლევების ჩატარებას უფასოდ შეძლებენ.

სამედიცინო აქციის ფარგლებში, ძუძუს კიბოს, საშვილოსნოს ყელის კიბოს, პროსტატის, კოლორექტული კიბოს, არტერიული ჰიპერტენზიის, B და C ჰეპატიტების, აივ ინფექცია/შიდსის სკრინინგული კვლევები თანამედროვე მეთოდებით და კვალიფიციური სამედიცინო პერსონალის მიერ ჩატარდება.

„სკრინინგი ჯანმრთელობის დაცვის ერთ-ერთი ყველაზე ეფექტური საშუალებაა, რომელიც დაავადებებს ადრეულ ეტაპზე ავლენს, როცა მკურნალობა განსაკუთრებით შედეგიანია“, - აღნიშნულია დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ გავრცელებულ ინფორმაციაში.