11 სექტემბერი მსოფლიო ისტორიაში ყველაზე მეტად ასოცირდება 2001 წლის ტერაქტებთან აშშ-ში, თუმცა ამ თარიღს სხვა მნიშვნელოვანი პოლიტიკური, ისტორიული და რელიგიური კონტექსტიც გააჩნია როგორც საერთაშორისო ასპარეზზე, ისე საქართველოში.

2001 წლის 11 სექტემბრის ტერაქტი - ტერორისტულმა ორგანიზაცია „ალ-კაიდამ“ აშშ-ში ოთხი სამგზავრო თვითმფრინავი გაიტაცა. ორი მათგანი ნიუ-იორკის მსოფლიო სავაჭრო ცენტრის „ტყუპ ცათამბჯენებს“ დაეჯახა, მესამე - პენტაგონის შენობას, ხოლო მეოთხე პენსილვანიის ველზე ჩამოვარდა. ტრაგედიას 3000-მდე ადამიანის სიცოცხლე შეეწირა, რამაც სრულიად შეცვალა გლობალური უსაფრთხოების წესები, საავიაციო კონტროლი და სათავე დაუდო გლობალურ ომს ტერორიზმის წინააღმდეგ.

1973 წელი - სამხედრო გადატრიალება ჩილეში. გენერალმა აუგუსტო პინოჩეტმა სამხედრო გადატრიალების გზით დაამხო ქვეყნის დემოკრატიულად არჩეული მემარცხენე პრეზიდენტის, სალვადორ ალიენდეს ხელისუფლება. ალიენდემ სიცოცხლე თვითმკვლელობით დაასრულა, ქვეყანაში კი პინოჩეტის მრავალწლიანი სამხედრო დიქტატურა დამყარდა.

1609 წლის მანჰეტენის აღმოჩენა - ინგლისელმა ზღვაოსანმა ჰენრი ჰადსონმა პირველად დაადგა ფეხი მანჰეტენის კუნძულზე (დღევანდელი ნიუ-იორკი), რაც რეგიონის შემდგომი კოლონიზაციის საწყისად იქცა.

იოანე ნათლისმცემლის თავისკვეთის დღე - საქართველოს მართლმადიდებელი ეკლესია (ახალი სტილით) 11 სექტემბერს აღნიშნავს უდიდესი წინასწარმეტყველის, წმინდა იოანე ნათლისმცემლის თავისკვეთის ხსენების დღეს. ეს რელიგიური თარიღი საეკლესიო კალენდრით მარხვის დღედ არის გამოცხადებული.