საერთაშორისო გამოფენაში - Caspian Agro 2026 მონაწილეობის მისაღებად განაცხადების მიღება დღეს, 14 იანვარს 12:00 საათზე დაიწყება და 28 იანვრის 18:00 საათის ჩათვლითაა შესაძლებელი.

როგორც სოფლის განვითარების სააგენტოში აცხადებენ, მათი ორგანიზებით, გამოფენაში მონაწილეობას შეძლებენ საკვები ან/და სასმელი პროდუქციის, ასევე სასოფლო-სამეურნეო ტექნიკის, ტექნოლოგიებისა და სხვა გამოფენის შინაარსის შესაბამისად მოქმედი კომპანიები.

„საერთაშორისო გამოფენა Caspian Agro 2026 5-8 მაისს ქალაქ ბაქოში, აზერბაიჯანის რესპუბლიკაში გაიმართება და მონაწილე კომპანიებს საშუალებას აძლევს, დაამყარონ საქმიანი კავშირები ადგილობრივ და უცხოელ ბიზნესოპერატორებთან.

გამოფენა ერთ სივრცეში აერთიანებს სოფლის მეურნეობის ინდუსტრიით დაინტერესებულ პირებს: ადგილობრივ და უცხოელ ექსპერტებს და ათასობით ვიზიტორს, მათ შორის იმპორტიორებს, ექსპორტიორებს, დისტრიბუტორებს, საბითუმო და საცალო ვაჭრობის წარმომადგენლებს და ფერმერებს.

აღსანიშნავია, რომ გასულ წელს გამოფენაში სოფლის მეურნეობის სექტორში მოქმედი 300-მდე ადგილობრივი და საერთაშორისო კომპანია (28 ქვეყნიდან) მონაწილეობდა და 15 000-მდე ვიზიტორი სტუმრობდა“, - აცხადებენ სააგენტოში.

გამოფენაზე პროდუქციის წარდგენის მსურველმა მეტი ინფორმაციისთვის უნდა დარეკოს სააგენტოს ცხელ ხაზზე: 1501.

ცნობისთვის, 2026 წელს ქართული პავილიონის მოწყობა 10 ქვეყანაში, 11 საერთაშორისო გამოფენაზე იგეგმება და ქართული პავილიონების მოწყობა გათვალისწინებულია გერმანიაში, იაპონიაში, ნიდერლანდებში, საუდის არაბეთში, აზერბაიჯანში, ჩინეთში, ინდოეთში, კატარში, ესპანეთსა და ამერიკის შეერთებულ შტატებში.