საქართველოში ოქროს ფასი კვლავ გაიზარდა. თუმცა, როგორც სამკაულების რეალიზატორები ამბობენ, არა იმ მასშტაბით, როგორც ეს მსოფლიო ბირჟაზე ხდება.

უკანასკნელი მონაცემებით, მსოფლიო ბირჟაზე ოქროს ფასი რეკორდებს ამყარებს. Gold Price-ის გავრცელებული ინფორმაციით, ბოლო 30 დღეში ოქრო 6.7 %-ით გაძვირდა და ამ ეტაპზე 1 უნცია ოქროს ღირებულება 4 587 დოლარს შეადგენს.

ახალი წლის შემდეგ საქართელოში ოქროს ფასმა მცირედით მოიმატა. ძვირფასი ნაკეთობების ექსპერტ-შემფასებლები კი ვარაუდობენ, რომ თუ ოქრო გლობალურ ბირჟაზე კიდევ გაძვირდა, ფასმა საქართველოში, შესაძლოა, 50-დან 100 ლარამდე მოიმატოს.

რაც შეეხება გორს, ძვირფასი ლითონების სარეალიზაციო მაღაზიებში, დღეის მდგომარეობით, 1 გრამი ბაჟაღლოს ფასი 380-400 ლარებში მერყეობს, წითელი ოქრო 250 ლარი ღირს, ხოლო იტალიური ოქროს ფასი 300 ლარამდეა.

როგორც ოქროს სამკაულების რეალიზატორები „გორის მაცნესთან“ აღნიშნავენ, ფასები ნაკეთობების მიხედვით მერყეობს და, ფაქტობრივად, ყოველდღიურად იცვლება.