გორის მუნიციპალიტეტის საკრებულოს რიგგარეშე სხდომაზე მუნიციპალიტეტის 2026 წლის ბიუჯეტი დამტკიცდა.

სხდომას გორის მუნიციპალიტეტის მერი კონსტანტინე ბუზალაძე და მერიის საფინანსო და ადმინისტრაციული სამსახურების წარმომადგენლები ესწრებოდნენ.

დღევანდელ სხდომაზე დღის წესრიგით 3 საკითხი იყო განსახილველი:

1. „გორის მუნიციპალიტეტის 2026 წლის ბიუჯეტის დამტკიცების შესახებ“ დადგენილების პროექტი;
2. „გორის მუნიციპალიტეტის 2025 წლის ბიუჯეტის დამტკიცების შესახებ“ გორის მუნიციპალიტეტის საკრებულოს 2024 წლის 24 დეკემბრის 29 დადგენილებაში ცვლილების შეტანის შესახებ“ დადგენილების პროექტი;
3. „გორის მუნიციპალიტეტში 2026 წელს საქართველოს სახელმწიფო ბიუჯეტით გათვალისწინებული საქართველოს რეგიონებში განსახორციელებელი პროექტების ფონდიდან დასაფინანსებელი პროექტების მოწონების თაობაზე“.

მუნიციპალიტეტის საკრებულოს მერიამ ბიუჯეტის პროექტი დასამტკიცებლად ნოემბერში წარუდგინა, თუმცა, 24 ნოემბერს გამართულ რიგგარეშე სხდომაზე საკრებულომ მერიას ბიუჯეტის პროექტი წინადადებებთან ერთად დაუბრუნა.

დღევანდელ სხდომაზე, რომელსაც საკრებულოს თავმჯდომარე მარლენ ნადირაძე უძღვებოდა,  გორის მუნიციპალიტეტის 2026 წლის მთავარი ფინანსური დოკუმენტი დეპუტატებმა ერთხმად დაამტკიცეს.