ჩინური კალენდრის მიხედვით, 2026 ცეცხლოვანი ცხენის წელიწადია. ასტროლოგების ინფორმაციით, ცხენის ენერგია ზოდიაქოს თითოეული ნიშნის წარმომადგენელს ცხოვრების ახალ გზას უხსნის და მნიშვნელოვანი ცვლილებების განხორციელებაში ეხმარება.

ცხენი ენერგიის, თავისუფლების, სისწრაფისა და შემოქმედებითი ძალის სიმბოლოა, ამასთან, როდესაც ამ სიმბოლოს ემატება ცეცხლის ელემენტი, ვიღებთ განსაკუთრებულად ძლიერ, აქტიურ და დინამიკურ წელს, ანუ პერიოდს, რომელიც ერთდროულად აღძრავს დიდ შესაძლებლობებს და მოითხოვს სიფრთხილეს.

თითქმის სამი ათწლეულის შემდეგ, თებერვლის მეორე ნახევარში, პლანეტა სატურნი  პირველად შევა ვერძის ნიშანში, რაც ახალი ასტროლოგიური ციკლის დასაწყისს აღნიშნავს და მნიშვნელოვან ცვლილებებს მოასწავებს.

რაც შეეხება კონკრეტულ ნიშნებს ჩინური ჰოროსკოპის მიხედვით - ვისთვის როგორი იქნება 2026 წელი:

განსაკუთრებით წარმატებული წელი ექნებათ:

ვეფხვს – ვეფხვი და ცხენი ბუნებით თანამოაზრეები არიან - ორივეს მოსწონს რისკი, მოძრაობა და გამოწვევები. 2026 წელი ვეფხვებისთვის იქნება კარიერული წინსვლის, ახალი ლიდერული როლისა და შემოქმედებითი მიღწევების წელი. მათთვის სასურველია ყურადღება გაამახვილონ საკუთარი ენერგიის მართვაზე, რათა ზედმეტად არ გადაიტვირთონ.

ძაღლს – ძაღლი და ცხენი ქმნიან ბუნებრივ ჰარმონიას ჩინურ ასტროლოგიაში. ძაღლს ეძლევა შანსი, განიმტკიცოს ფინანსური და პირადი ურთიერთობები. 2026 წელი მათთვის იქნება სტაბილურობისა და საკუთარი ძალების აღიარების პერიოდი.

ცხვარს - ცხენის ენერგია ცხვრისთვის შეიძლება აღმოჩნდეს მოულოდნელი შთაგონების წყარო. ეს წელი ხელს შეუწყობს შემოქმედებით საქმიანობას, ხელოვნებასა და პირად განვითარებას. რბილი და მშვიდი ბუნების მქონე ცხვრებს მოუწევთ გამბედაობა, რათა გამოიყენონ მათთვის მიცემული შესაძლებლობები.

ვინ უნდა იფრთხილოს 2026 წელს:

ყველაზე რთული წელი შეიძლება ჰქონდეთ ვირთხის ნიშნის წარმომადგენლებს. ცხენი და ვირთხა ჩინურ ჰოროსკოპში ერთგვარი „მტრული წყვილია“,  ისინი განსხვავდებიან ცხოვრებისეულ მიდგომაშიც -  ცხენს სურს თავისუფლება და თავგადასავალი, ვირთხას კი უსაფრთხოება და სტრატეგია. ამიტომ 2026 წელს, ვირთხები უნდა მოერიდონ დაძაბულ ურთიერთობებს და ფინანსურ რისკებს.

ასევე სიფრთხილე მართებს თავად ცხენს, ანუ იმ ადამიანებს, ვინც ცხენის წელშია დაბადებული. ასეთ პერიოდში ენერგია ძლიერდება, ამასთან იზრდება კონფლიქტების, სტრესისა და მოულოდნელი სირთულეების ალბათობა. ცხენებს 2026 წელს ურჩევენ ყურადღება გაამახვილონ ჯანმრთელობაზე და მოერიდონ გადაღლას და კონფლიქტებს.

აქვე გაგაცნობთ ასტროლოგიურ პროგნოზს ზოდიაქოს 12 ნიშნისთვის:

ვერძი

2026 წელი ვერძებისთვის პრიორიტეტების დასახვის დროა. ასტროლოგები ზოდიაქოს აღნიშნული ნიშნის წარმომადგენლებს აფრთხილებენ, რომ თუ ისინი კვლავ თავდაუზოგავად ჩაერთვებიან მხოლოდ სამსახურში, შემოდგომაზე შეიძლება, განსაკუთრებული დაღლილობა და ჯანმრთელობის პრობლემები იგრძნონ. ვარსკვლავები მაისში მნიშვნელოვან ადამიანთან შეხვედრას გიწინასწარმეტყველებენ, რომელსაც შეუძლია, თქვენი ცხოვრება სრულად შეცვალოს. ეს წელი ძალიან ბევრ ახალ შესაძლებლობას მოგიტანთ, თუმცა, უნდა გახსოვდეთ, რომ ბალანსის დაცვა აუცილებელია.

კურო

კუროს 2026 წელი როგორც გამოწვევებს, ასევე ახალ ჰორიზონტებს მოუტანს. წლის დასაწყისში შესაძლებელია, ერთგვარმა გაურკვევლობამ და პრობლემებმა იჩინოს თავი, ამიტომ, მნიშვნელოვანია, საკუთარი სურვილები და პრინციპები კიდევ ერთხელ სრულად გაიაზროთ და დაფიქრდეთ, რას მიანიჭოთ უპირატესობა. ასტროლოგების პროგნოზით, კუროსთვის სიტუაცია ზაფხულში გამოსწორდება. მნიშვნელოვანია ასევე, ფინანსებთან დაკავშირებით დიდი ყურადღება გამოიჩინოთ, რადგანაც არამიზნობრივი ხარჯების რისკი იზრდება.

ტყუპები

ტყუპებისთვის 2026 წელს მნიშვნელოვანია სწორი კომუნიკაცია, რაც გაუგებრობების თავიდან არიდებას ხელს შეუწყობს. როგორც ასტროლოგები ამბობენ, მარტში ფინანსური სირთულეებია მოსალოდნელი და ბიუჯეტის გადახედვა და არასაჭირო ხარჯების შემცირება მოგიწევთ, თუმცა, წლის მეორე ნახევარში ამ ნიშნის წარმომადგენლებს ექნებათ შესაძლებლობა, რომ ოცნებები აისრულონ და სასურველ საქმეში წარმატებას მიაღწიონ.

კირჩხიბი

2026 წლის პირველი ნახევარი სიმშვიდესა და ჰარმონიას ჰპირდება კირჩხიბებს. მათ ექნებათ შესაძლებლობა, არსებულ საქმეებსა და ურთიერთობებს მიჰყვნენ. თუმცა, მეორე ნახევრიდან დიდი ცვლილებები დაიწყება. ასტროლოგები მშვიდი თვეების მოსამზადებლად გამოყენებას გირჩევენ. ჯობს, სარეზერვო გეგმები შეიმუშაოთ და ასევე, ახლობლებისა და საყვარელი ადამიანებისაგან დახმარების მიღებაზე უარი არ თქვათ. წლის მეორე ნახევარში შესაძლებელია ინტრიგები და კონფლიქტები როგორც სახლში, ასევე სამსახურში. მნიშვნელოვანია, გაუგებრობები თავიდანვე მოაგვაროთ და არ გადადოთ, რითაც კრიზისის თავიდან არიდებას შეძლებთ.

ლომი

2026 წელი ლომებს საკუთარი თავისა და შესაძლებლობების ხელახლა აღმოჩენის შესაძლებლობას მისცემს. წლის დასაწყისში ზოგიერთი გამოწვევა წარსულ შეცდომებს გაგახსენებთ და შესაძლოა, გეგმების შეცვლაც მოგიწიოთ. ცხოვრების წესს განსაკუთრებული ყურადღება მიაქციეთ, ჯანმრთელობას უფრო მეტი ყურადღება დაუთმეთ. პოზიტიური ცვლილებები ზაფხულსა და შემოდგომით გელით.

ქალწული

2026 წელი სასიყვარულო სფეროში რადიკალური ცვლილებების გარეშე ჩაივლის ქალწულებისთვის. ეს კარგი დროა სამუშაოსა და ფინანსებზე ფოკუსირებისთვის. წლის დასაწყისში თქვენი შემოსავლის წყაროების გადახედვა და ახალი შემოსავლის შესაძლებლობების განხილვა მოგიწევთ და თქვენი ძალისხმევა უშედეგო ნამდვილად არ იქნება. 2026 წელი ქალწულისთვის, ძირითადად, ფინანსური შესაძლებლობების წელია. შეიძლება, დაწინაურდეთ ან ბონუსი მიიღოთ და საკუთარი ბიუჯეტი საგრძნობლად გააუმჯობესოთ.

სასწორი

2026 წელს სასწორი კვლავ მნიშვნელოვანი არჩევანის წინაშე აღმოჩნდება - რისკზე წასვლა და ახალი წამოწყების დაწყება ჯობია თუ ნაცნობ გზაზე დარჩენა. გარემოებები ცვლილებებისკენ გიბიძგებთ და ამიტომ, მოგიწევთ, კომფორტის ზონა დატოვოთ. გადამწყვეტი ნაბიჯების გადადგმისთვის საუკეთესო დრო თებერვლის ბოლოსა და სექტემბრის ბოლოსაა. არჩევანის გაკეთება ადვილი არ იქნება, მაგრამ სასწორი ამ პერიოდში კარგ მოკავშირეებს იპოვის.

მორიელი

2026 წელს მორიელისთვის პროფესიული ცხოვრება  შეუფერხებლად განვითარდება. მარტოხელა მორიელებს სერიოზული პარტნიორის პოვნის შანსი აქვთ, ხოლო თუ უკვე ურთიერთობაში ხართ, გაქვთ შესაძლებლობა, თქვენი კავშირი ბევრად უფრო განამტკიცოთ და ჰარმონიული გახადოთ. ასტროლოგები გირჩევენ, რომ უნდობლობის გამოვლენით არ გადააჭარბოთ და ურთიერთობები არ დაძაბოთ. გახსნილობა და გულწრფელობა კონფლიქტებს თავიდან აგარიდებთ.

მშვილდოსანი

2026 წელი მშვილდოსანს თვითრეალიზაციის უამრავ შესაძლებლობას შესთავაზებს. ენერგიით, იდეებითა და მოტივაციით სავსე იქნებით. ვარსკვლავები გირჩევენ, რომ თქვენი შესაძლებლობები და უნარები სრულად გამოიყენოთ. ცეცხლოვანი ცხენის წელი საშუალებას გაძლევთ, რომ ამბიციურ გეგმებს შეეჭიდოთ, გაიღრმავოთ ცოდნა და ოცნების პროექტების განხორციელება დაიწყოთ. მნიშვნელოვანია გახსოვდეთ, რომ წარმატება მხოლოდ სისტემატური მუშაობითა და საქმის ბოლომდე მიყვანით მიიღწევა.

თხის რქა

2026 წელი თხის რქებისთვის, ძირითადად, წინა წლის გაგრძელება იქნება. 2025 წელს დაწყებული ყველა მნიშვნელოვანი პროექტი და ცვლილება ჩვეულებისამებრ გაგრძელდება. ვარსკვლავები თხის რქებს მოთმინებისკენ მოუწოდებენ. დიდი ალბათობით, 2026 წელს მკვეთრი ცვლილებები არ იქნება, მაგრამ სამყარო გაძლევთ შანსს, არსებული საქმეები და წარმატებები გააძლიეროთ. შესაძლოა, პერიოდული დაბრკოლებების ფონზე, თქვენი შესაძლებლობებისა და უნარების გამოცდაც მოგიწიოთ, მაგრამ შრომისმოყვარეობა და დისციპლინა ყველაფრის დაძლევაში დაგეხმარებათ.

მერწყული

მერწყულებს 2026 წელს ექნებათ შანსი, თავიანთი ფინანსური მდგომარეობა გააძლიერონ, გარემოებები თქვენ მხარესაა. ვარსკვლავები გირჩევენ, თქვენი შესაძლებლობები, ნიჭი და უნარები თამამად გამოავლინოთ. დიდი შანსია, ამ წელს უფრო სტაბილური და მაღალი შემოსავალი მიიღოთ. თუმცა, საეჭვო წამოწყებებსა და სესხების აღებას მოერიდეთ. ფინანსური სტაბილურობა მოგცემთ შესაძლებლობას, თვითგანვითარებაზე იფიქროთ. 2026 წელს გექნებათ შანსი, რომ უნარები გაიმრავალფეროვნოთ და წარმატებას მიაღწიოთ.

თევზები

2026 წელს, თევზებს გარემოებები მნიშვნელოვანი ცვლილებებისკენ გიბიძგებთ. თუ ამ წელს იმ იდეებისა და გეგმების განხორციელებას დაიწყებთ, რომლებზეც დიდი ხანია ფიქრობთ, მაგრამ აქამდე რაღაც გიშლიდათ ხელს, ცეცხლოვანი ცხენის წელიწადში დიდ წარმატებას მიაღწევთ. მთავარია, რომ სიახლეებისთვის მზად იყოთ. თქვენი ცხოვრების ბევრ სფეროში 2026 წელი მნიშვნელოვან ცვლილებებს გიმზადებთ. სამსახურში ახალი პროექტები, ასევე  პირად ცხოვრებაში ცვლილებები თავიდან რთულად მოგეჩვენებათ, მაგრამ ამ სირთულეების გადალახვით მიაღწევთ იმას, რაც გსურთ.