გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, 2025 წლის 1-ელი სექტემბრიდან 30 სექტემბრის ჩათვლით, შიდა ქართლში უკანონო ტყითსარგებლობის 6 ფაქტი გამოავლინეს.

სამინისტროს მიერ გავრცელებული ინფორმაციით, საქართველოს მასშტაბით, ჯამში, უკანონო ტყითსარგებლობის 106 ფაქტი გამოავლინეს. მათ შორის, 71 ხე-ტყის უკანონო მოპოვება-ტრანსპორტირებას ეხება, 35 კი სახერხი საამქროების მიერ ტექნიკური რეგლამენტის დარღვევის და უკანონო სახერხი საამქროების ფაქტებია. სამართალდარღვევებიდან 13 ფაქტი სისხლის სამართლის დანაშაულის ნიშნებს შეიცავს და მასალები, შემდგომი რეაგირების მიზნით, შესაბამის უწყებებში გადაიგზავნა.

„ბუნებრივი რესურსების დაცვა და ტყით უკანონო სარგებლობის ფაქტების პრევენცია, აღკვეთა და გამოვლენა დეპარტამენტისთვის პრიორიტეტია.

სწორედ ამიტომ, უწყების ეკიპაჟები ქვეყნის მასშტაბით 24 საათის განმავლობაში უწყვეტად პატრულირებენ და სამინისტროს ცხელ ხაზზე (153) შემოსულ თითოეულ შეტყობინებაზეც მყისიერ რეაგირებას ახდენენ.

შედეგად, მიმდინარე წლის სექტემბერში, სხვადასხვა რეგიონში არაერთი სამართალდარღვევა გამოვლინდა. ყველაზე მეტი - 32 ფაქტი დაფიქსირდა აჭარაში; იმერეთში გამოვლენილია 22 სამართალდარღვევა, კახეთში - 10, სამცხე-ჯავახეთშიც - 10, სამეგრელო-ზემო სვანეთშიც - 10, რაჭა-ლეჩხუმი-ქვემო სვანეთში - 8, ქვემო ქართლში - 7, შიდა ქართლში - 6, გურიაში კი - 1.

ჯამში, 208 კუბურ მეტრზე მეტი მოცულობის უკანონოდ მოპოვებული ხე-ტყეა ამოღებული.

ამავე პერიოდში, ქვეყნის მასშტაბით, დალუქულია 5 ერთეული არარეგისტრირებული სახერხი საამქრო.

უკანონო ტყითსარგებლობასთან ბრძოლის ფარგლებში, დეპარტამენტი აქტიურად იყენებს თანამედროვე ტექნოლოგიებს. პარალელურად, კიდევ უფრო გამკაცრდა სანქციები. ყველა აღნიშნული ქმედების შედეგად, ბოლო წლებში უკანონო ტყითსარგებლობის ფაქტების კლება შეინიშნება“, - აცხადებენ გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტში.

რაც შეეხება წლის სტატისტიკას, მიმდინარე წლის ცხრა თვეში დეპარტამენტის თანამშრომლებმა ქვეყნის მასშტაბით უკანონო ტყითსარგებლობის 1221 ფაქტი გამოავლინეს. 52 უკანონო სახერხი საამქრო დალუქულია.