ემიგრაციიდან დაბრუნებულ საქართველოს მოქალაქეებს, გორში, ტექნიკა გადაეცათ.

სასოფლო-სამეურნეო სამუშაოების ხელშეწყობის მიზნით, ამ ეტაპზე, ხელის ტრაქტორები შიდა ქართლის რეგიონში მცხოვრებმა 18-მა, ხოლო, ქვეყნის მასშტაბით, 80-მდე დაბრუნებულმა მიგრანტმა მიიღო.

„გორის მაცნესთან“ ემიგრაციიდან დაბრუნებულმა, სკრის დევნილთა ჩასახლებაში მცხოვრებმა ქეთევან შევარდენიძემ აღნიშნა, რომ სამშობლოში დაბრუნებული, სოფლად მცხოვრები პირებისთვის აღნიშნული თანადგომა ძალიან მნიშვნელოვანია.

„სხვადასხვა გარემოების გამო, იტალიაში წავედი სამუშაოდ და ორი წლის შემდეგ დავბრუნდი. აღნიშნული პროგრამის შესახებ რომ გავიგე, შევიტანე პროექტი სააგენტოში და ტექნიკაც გადმომეცა. ახლა უკვე შემიძლია, რომ უკეთ მივხედო სასოფლო-სამეურნეო ნაკვეთებს და ოჯახის წევრებთან ერთად, დავსაქმდე საკუთარ მეურნეობაში“, - აღნიშნა ქეთევან შევარდენიძემ.

„დევნილთა, ეკომიგრანტთა და საარსებო წყაროებით უზრუნველყოფის სააგენტოს პროგრამის მთავარ მიზანს რეინტეგრაციის პროცესის მხარდაჭერა წარმოადგენს.

დაბრუნებულ მიგრანტთა რეინტეგრაციის სახელმწიფო პროგრამის ფარგლებში, შემოსავლის წყაროს გაჩენის, დასაქმების თუ თვითდასაქმების ხელშეწყობისთვის, სხვადასხვა ტიპის ტექნიკა და ინვენტარი, ყოველწლიურად, 200-მდე მიგრანტს გადაეცემა“, - აღნიშნეს დევნილთა, ეკომიგრანტთა და საარსებო წყაროებით უზრუნველყოფის სააგენტოში.