პროფესიულ საგანმანათლებლო პროგრამებზე რეგისტრაცია 1-ელ სექტემბერს დაიწყება და 25 სექტემბრის ჩათვლით გაგრძელდება.

საქართველოს მასშტაბით მოქმედ პროფესიულ საგანმანათლებლო პროგრამების განმახორციელებელ დაწესებულებებში ჩასარიცხად რეგისტრაცია შესაძლებელია როგორც ონლაინ, ასევე, ვებგვერდზე: vet. emis. ge

როგორც განათლების, მეცნიერების და ახალგაზრდობის სამინისტროში აცხადებენ, წელს, საჯარო და კერძო პროფესიული დაწესებულებები სტუდენტებს მრავალფეროვან საგანმანათლებლო პროგრამებზე მიიღებენ.

„2025 წელს, გაიზარდა ინტეგრირებული პროგრამების რაოდენობა, რაც, საბაზო განათლების მქონე პირებს, საშუალებას აძლევს, პროფესიულ განათლებასთან ერთად, მიიღონ სრული ზოგადი განათლებაც. აღნიშნული პროგრამების დასრულების შედეგად, გაიცემა პროფესიული დიპლომი და სრული ზოგადი განათლების დამადასტურებელი დოკუმენტი - ატესტატი. სურვილის შემთხვევაში, კურსდამთავრებულებს აქვთ უმაღლესი განათლების საფეხურზე სწავლის გაგრძელების შესაძლებლობა.

რეგისტრაცია, ასევე, მიმდინარეობს სამუშაოზე დაფუძნებული სწავლების ფორმით განხორციელებულ პროგრამებზე. აღნიშნული მიდგომა საგანმანათლებლო დაწესებულებასა და კომპანიას შორის პასუხისმგებლობის განაწილებას გულისხმობს, როდესაც პროგრამით გათვალისწინებული სწავლის შედეგების გარკვეული ნაწილი მიიღწევა რეალურ სამუშაო გარემოში, კონკრეტულ კომპანიაში“, - აცხადებენ სამინისტროში.

2025 წელს შეთავაზებული პროფესიული საგანმანათლებლო დაწესებულებების და პროგრამების სრული ჩამონათვალი, ასევე, რეგისტრაციის ინსტრუქცია დაინტერესებულ პირებს შეუძლიათ იხილონ პორტალზე: vet. emis. ge, ან დარეკონ ცხელ ხაზზე (+995 32) 2200 220.