დღეიდან, 15 აგვისტოდან ნარკოდამოკიდებული ადამიანებისთვის ჩანაცვლებითი თერაპიის განხორციელება სრულად სახელმწიფოს დაქვემდებარებაში გადადის და კერძო სუბიექტებს აღნიშნული მომსახურების გაწევა ეკრძალებათ.

როგორც ჯანდაცვის მინისტრმა მიხეილ სარჯველაძემ განაცხადა, ჩანაცვლებითი თერაპიის განხორციელებაზე პასუხისმგებლობას მთლიანად იღებს სახელმწიფო. სამედიცინო ცენტრები სრულ მზადყოფნაში არიან როგორც კვალიფიციური სამედიცინო გუნდის, ასევე, საჭირო მედიკამენტებისა და ინფრასტრუქტურული კუთხით.

„კერძო მიმწოდებლების ბენეფიციარებიდან, საკმაოდ დიდმა ნაწილმა - 1512-მა პირმა  მომართა სახელწიფო სერვისს და პრაქტიკულად ყველა მათგანი, ხვალიდან შეძლებს მომსახურების  უფასოდ მიღებას. დაახლოებით, 100-მდე ადამიანს კი სხვადასხვა მიზეზის გამო ვერ დაერთო ნება მომსახურების გაგრძელებაზე. მაგალითად, მოგვმართეს პირებმა რომელთა შესახებაც ინფორმაცია შესაბამისმა კერძო დაწესებულებებმა არ დაადასტურა. არიან, ასევე, ადამიანები, რომლებიც ინციდენტური მომხმარებლები არიან და მათ შეეძლებათ ცალკე, დამოუკიდებლად მომართონ სახელმწიფო ცენტრებს და გაიარონ შესაბამისი პროცედურები.
თუკი ვინმეს ჰქონდა სახელმწიფოსთვის მომართვის ობიექტური დამაბრკოლებელი გარემოებები, მივიღეთ გადაწყვეტილება, რომ 22 აგვისტოს ჩათვლით, გამარტივებული პროცედურების გავლის შედეგად, ისინი ჩაირიცხებიან სახელმწიფო პროგრამაში. აქვე მინდა, წარმატება ვუსურვო თითოეულ ბენეფიციარს, რომ მათ შეძლონ და დაამარცხონ ის მძიმე სენი, რასაც ჰქვია ნარკოდამოკიდებულება და ამისთვის სახელმწიფო ძალისხმევას ნამდვილად არ დაიშურებს“, - აღნიშნა მინისტრმა.