არასტანდარტული ვაშლის მოსავლის რეალიზაციის ხელშეწყობის პროგრამით ფერმერები წელსაც ისარგებლებენ.

როგორც სააგენტოში აცხადებენ, პროგრამის მიზანი, მეხილეობის სფეროში დასაქმებული ფიზიკური პირების მიერ მიღებული ვაშლის მოსავლის რეალიზაციის ხელის შეწყობაა.

სოფლის განვითარების სააგენტოს ინფორმაციით, არასტანდარტული ვაშლის გადამამუშავებელი კომპანიები, რომლებიც 2025 წლის 15 დეკემბრამდე 1 კგ. არასტანდარტულ ვაშლს არანაკლებ 0.27 ლარად შეისყიდიან, 1 კგ. არასტანდარტულ ვაშლზე სუბსიდიას 0.10 ლარის ოდენობით მიიღებენ.

მთავრობამ უკვე გამოსცა განკარგულება, რომლის მიხედვითაც 2025 წელს არასტანდარტული ვაშლის სუბსიდირებისთვის 5 მლნ ლარის გამოყოფაა გათვალისწინებული, ამასთან, გამკაცრდა მოთხოვნები იმ კომპანიებისთვის, რომლებსაც სუბსიდიის მიღების სურვილი ექნებათ. არასტანდარტული ვაშლის სუბსიდირების პროგრამა წელს გამკაცრებული მონიტორინგის პირობებში განხორციელდება - მოხდება პროცესის სრული ვიდეოჩაწერა და მონიტორინგის ცენტრს ჩანაწერებზე სრული წვდომა ექნება.

„კომპანიებს, რომლებსაც განზრახული აქვთ ვაშლის მიღება/ ჩაბარება, უნდა გაიარონ რეგისტრაცია სააგენტოს დამტკიცებული პროცედურით, იქონიონ მაღალსიჩქარიანი ინტერნეტი და ჩაბარება მხოლოდ ელექტრონული სასწორით განახორციელონ; ასევე, ევალებათ ჰქონდეთ საწარმოს ტერიტორიაზე ვიდეოსამეთვალყურეო სისტემა. კომპანიების ვალდებულებაა, ჰქონდეთ ვიდეოჩანაწერი იმ ვაშლის მიღება/ ჩაბარების და გადამუშავების პროცესისა, რომელზედაც მოითხოვენ სუბსიდიას. სააგენტო კი ვალდებულია ეს ჩანაწერები 2026 წლის 31 მაისამდე შეინახოს“, - აცხადებენ სააგენტოში.