გორის განვითარების სააგენტოს ტანისა და თეძმის დაცული ლანდშაფტის მართვისა და მუნიციპალური განვითარების განყოფილებების ორგანიზებით გამართული „მომავლის მწვანე ბანაკი“ დასრულდა.

პროექტის ფარგლებში გორის მუნიციპალიტეტში მცხოვრები 13-18 წლის ახალგაზრდები ეუფლებოდნენ ცოდნას და უნარებს, რომლებიც სამომავლოდ ეკოლოგიური ცნობიერების ამაღლებასა და ბუნების დაცვისადმი მოტივაციის გაზრდაში დაეხმარება.

ორგანიზატორების თქმით, ბანაკის განმავლობაში მონაწილეებმა, ასევე, მიიღეს ამომწურავი თეორიული ინფორმაცია ტანისა და თეძმის უნიკალური ბუნების, ბიომრავალფეროვნების და გარემოს დაცვის მნიშვნელობის შესახებ. მოისმინეს საინტერესო თემები ცირკულარული ეკონომიკის და გარემოს დაცვაზე. ბოლო შეხვედრაზე კი პლასტმასის ნარჩენებისგან საინტერესო და პრაქტიკული ნივთები დაამზადეს.

მშვიდობის კორპუსის მოხალისეს ხელმძღვანელობით, მონაწილეებმა, შეისწავლეს პრეზენტაციის უნარები და Canva-ში ბროშურის აწყობაც, რომლის მეშვეობითაც  ტანისა და თეძმის დაცული ლანდშაფტის შესახებ ინფორმაციული ბროშურა შექმნეს.