გორის მუნიციპალიტეტში ბავშვიანი ოჯახების საჭიროებებზე მორგებული პროგრამების გაუმჯობესების მიზნით, კვლევა მიმდინარეობს.

ადგილობრივი თვითმმართველობის ინფორმაციით, პროცესს გორის მუნიციპალიტეტის მერიის სოციალური და ჯანდაცვის სამსახურის ბავშვის დაცვისა და მხარდაჭერის განყოფილება უძღვება. კვლევის პროცესი  როგორც მონაცემების შეგროვებას, ანალიზსა და ლიტერატურის კვლევას, ასევე, სოციოლოგიურ კვლევებს (ონლაინ კითხვარი, ინტერვიუები, ფოკუს-ჯგუფები) გულისხმობს.

 „კვლევის ერთ-ერთი მნიშვნელოვანი კომპონენტი ონლაინ კითხვარია. შედეგების სიზუსტეს კი  მიზნობრივი ჯგუფების მაქსიმალური ჩართულობა უზრუნველყოფს.

რაც შეეხება კვლევის მიზანს, მუნიციპალიტეტში მცხოვრები ბავშვების და ბავშვიანი ოჯახების საჭიროებების და მათი გამომწვევი მიზეზების იდენტიფიცირება, ადგილობრივი სოციალური პოლიტიკის და სამომავლო მუნიციპალური პროგრამების ძირითადი მიმართულებების განსაზღვრაა.

შესაბამისად, აღნიშნულ პროცესში მოსახლეობის აქტიური მონაწილეობა საშუალებას მისცემს მუნიციპალიტეტს, მომავალში კიდევ უფრო ეფექტურად დაგეგმოს და განახორციელოს სოციალური პროგრამები, რომლებიც მაქსიმალურად იქნება მორგებული ადგილობრივი ბავშვიანი ოჯახების საჭიროებებზე“, - აღნიშნავენ გორის მერიაში.

კვლევაში მონაწილეობა შესაძლებელია გორის მუნიციპალიტეტის მერიის ოფიციალურ ფეისბუქგვერდზე განთავსებულ ბმულზე.