რუსეთ-საქართველოს ომიდან ჩვიდმეტი წელი გავიდა. 2008 წლის აგვისტოს ომის წლისთავთან დაკავშირებით, გორში სხვადასხვა ღონისძიება გაიმართა.

ცენტრალური და ადგილობრივი ხელისუფლების წარმომადგენლებმა, ქალაქში არსებული საქართველოს ერთიანობისთვის დაღუპულთა მემორიალები გვირგვინებით შეამკეს და კიდევ ერთხელ გაიხსენეს 17 წლის წინ გორში განვითარებული მოვლენები.

დღეს, ტრადიციულად, გორისა და ატენის ეპარქიის მმართველმა, მეუფე ანდრიამ (გვაზავა) ომში დაღუპულთა სულების სახელზე, საკათედრო ტაძრის მიმდებარედ არსებულ 2008 წლის აგვისტოს ომში დაღუპულთა სახელობის ქვა-ჯვართან საქართველოს ერთიანობისთვის დაღუპულთა სულების მოსახსენიებელ პანაშვიდი აღავლინა.

პანაშვიდს სასულიერო პირებთან ერთად, სამოქალაქო თანასწორობის საკითხებში სახელმწიფო მინისტრი თეა ახვლედიანი და ადგილობრივი ხელისუფლების წევრები, ასევე, რიგითი მოქალაქეები ესწრებოდნენ.

 „17 წლის წინ მომხდარი რუსეთ-საქართველოს ომი საქართველოს უახლესი ისტორიის ყველაზე მძიმე, მტკივნეული და ტრაგიკული მოვლენაა. ომმა ჩვენი მოქალაქეების სიცოცხლე შეიწირა, დავკარგეთ ტერიტორიები, ჩვენმა თანამოქალაქეებმა დაკარგეს საკუთარი სახლები და საკუთარ ქვეყანაში დევნილებად იქცნენ. მთავარი ამოცანაა, გავუფრთხილდეთ ჩვენი მოქალაქეების სიცოცხლეს და აღარასდროს დავუშვათ ჩვენი ქვეყნის ოკუპაცია. ქედს ვიხრი ომში დაღუპული ჩვენი სამხედროების, პოლიციელების და მშვიდობიანი მოსახლეობის ხსოვნის წინაშე, ვისი სოცოცხლეც ომმა შეიწირა.

მჯერა, რომ ჩვენი ქვეყანა დაიბრუნებს დაკარგულ ტერიტორიებს, გამთლიანდება, გაძლიერდება და ჩვენი დევნილები აუცილებლად დაუბრუნდებიან  მშობლიურ მიწა-წყალს“,  - აღნიშნა შიდა ქართლის სახელმწიფო რწმუნებულმა სიმონ გულედანმა.

გორის მუნიციპალიტეტის მერის მოვალეობის შემსრულებელმა კონსტანტინე ბუზალაძემ კიდევ ერთხელ გაიხსენა რუსეთ-საქართველოს ომი და აღნიშნა, რომ ომის დროს დაღუპულ გმირთა პატივისცემა ყველა ადამიანის მოვალეობაა.

„შევიკრიბეთ, რომ პატივი მივაგოთ ჩვენს გმირებს, მათ ხსოვნას. ჩვენ უნდა აღვზარდოთ ახალი თაობა ამ გმირების მაგალითზე, განსაკუთრებით მძიმე იყო ეს პერიოდი ჩვენი მუნიციპალიტეტისთვის. ვუთანაგრძნობ გარდაცვლილთა ოჯახებს, ახლობლებს... მინდა, ვუსურვო ჩვენს ქვეყანას გაძლიერება, გაერთიანება, მშვიდობიან გარემოში განვითარება. დიდება ჩვენს გმირებს, დიდება საქართველოს“, - აღნიშნა გორის მუნიციპალიტეტის მერის მოვალეობის შემსრულებელმა კონსტანტინე ბუზალაძემ.

შეგახსენებთ, 2008 წლის აგვისტოს რუსეთ-საქართველოს ომის დროს განხორციელებული საომარი მოქმედებების შედეგად, საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.