გორის მუნიციპალიტეტში ქარის კიდევ ერთი ელექტროსადგურის მშენებლობა იგეგმება. პროექტის განხორციელება დაგეგმილია სოფელ გორიჯვარის, ღვლევის, ტყემელასა და ხიდისთავს შორის მოქცეულ ტერიტორიაზე, რომელიც მდინარე მტკვრის მარჯვენა მხარეს, გორიდან 8 კმ-ის დაშორებით მდებარეობს.

ქარის ახალი სადგურის დადგმული სიმძლავრე 80 მგვტ იქნება, ხოლო წლიური გამომუშავება 324.346 გგვტ. პროექტით გათვალისწინებულია ჯამში 20 ტურბინის მონტაჟი, რომელთაგანაც თითოეულის სიმძლავრე 4.2 მგვტ-ს გაუტოლდება.

პროექტს შპს „ჯიდიეი დანრე“ ახორციელებს.

„გორის მუნიციპალიტეტი, როგორც არსებული ენერგოინფრასტრუქტურით და ხელმისაწვდომი სატრანსპორტო ქსელით გამორჩეული ტერიტორია, განსაკუთრებით ხელსაყრელია ქარის ენერგიის პროექტების განსახორციელებლად.

ქარის სიხშირიდან და გამომუშავებიდან გამომდინარე, ყველა ტურბინის მიერ გამომუშავებული ენერგია დაბალანსებული იქნება ისე, რომ ჯამური გამომუშავება არ გადააჭარბებს მემორანდუმით დადგენილ ლიმიტებს (80 მგვტ). გამომუშავებული ელექტროენერგია ჩაერთვება სახელმწიფო ელექტროსისტემაში.

პროექტი ხელს შეუწყობს ადგილობრივი ეკონომიკის გააქტიურებას, ახალი სამუშაო ადგილების შექმნას როგორც მშენებლობის, ისე ოპერირების ფაზაში და გააღრმავებს კერძო ინვესტიციების მოზიდვას რეგიონში“, - აღნიშნულია დოკუმენტში, რომელიც კომპანიამ გარემოს ეროვნული სააგენტოს წარუდგინა.

რაც შეეხება პროექტის განხორციელების ვადებს, სამუშაოების დაწყებიდან 12-18 თვის ვადაშია დაგეგმილი.