რუსეთ-საქართველოს 2008 წლის ომიდან 17 წელი გავიდა, სადაც საქართველოს თავდაცვის ძალების 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა. დაჭრილ და დაშავებულ სამხედრო და სამოქალაქო პირთა რაოდენობა სულ 2 232-ს შეადგენს, საიდანაც 1045 პირი სამხედრო მოსამსახურეა.

2008 წლის რუსეთ-საქართველოს ომის მე-17 წლისთავთან დაკავშირებით, დაღუპულთა ხსოვნისთვის პატივის მიგების ნიშნად, საქართველოს მთავრობის ადმინისტრაციის შენობაზე სახელმწიფო დროშა დაეშვა.

მთავრობის მეთაურის, პრემიერ-მინისტრი ირაკლი კობახიძის ხელმოწერილი განკარგულების საფუძველზე, საქართველოს აფხაზეთის და ცხინვალის რეგიონების უკანონო ოკუპაციის მიზნით რუსეთის მიერ საქართველოში განხორციელებული ფართომასშტაბიანი სამხედრო ინტერვენციის შედეგად დაღუპულთა ხსოვნის პატივსაცემად, საქართველოს მთელს ტერიტორიაზე, ადმინისტრაციული ორგანოების შენობებზე სახელმწიფო დროშები დაშვებულია.

სახელმწიფო დროშები დაშვებულია, ასევე, საზღვარგარეთ, საქართველოს დიპლომატიურ წარმომადგენლობებშიც.