გორის მუნიციპალიტეტის საკრებულოს, პარტია „ქართული ოცნება - დემოკრატიული საქართველოს“ შიდა ქართლის ქალთა რეგიონული ორგანიზაციის, ნიქოზის პირველადი ჯანდაცვის ცენტრის, გორის საზოგადოებრივი ჯანდაცვის ცენტრის და დაავადებათა კონტროლისა და საზოგადოებრივი ჯანმრთელობის ეროვნული ცენტრის შიდა ქართლის განყოფილების ურთიერთთანამშრომლობით, მუნიციპალიტეტის მოსახლებისთვის უფასო სკრინინგ-აქცია მოეწყო.

ღონისძიების ფარგლებში, მოქალაქეებმა, ნიქოზის პირველადი ჯანდაცვის ცენტრის მობილურ ამბულატორიულ ავტომობილში, კვალიფიციური ექიმების მეთვალყურეობით, ჩაიტარეს ძუძუს, სშვილოსნოს ყელის, მსხვილი ნაწლავის და პროსტატის კიბოს, ასევე, C ჰეპატიტის და არტერიული ჰიპერტენზიის სკრინინგი.

როგორც „გორის მაცნესთან“ გორის მუნიციპალიტეტის საკრებულოს თავმჯდომარის მოადგილემ, პარტია „ქართული ოცნება - დემოკრატიული საქართველოს“ შიდა ქართლის ქალთა რეგიონული ორგანიზაციის თავმჯდომარემ თამარ მურალოვამ აღნიშნა, აქცია მოქალაქეების ჯანმრთელობაზე ზრუნვას, მათთვის ხელის შეწყობას ემსახურებოდა.

„სკრინინგი, მოგეხსენებათ, ჩვენს ქვეყანაში უკვე დიდი ხანი მიმდინარეობს, თუმცა, რიგი მიზეზების გამო, მოქალაქეები ვერ ახერხებენ მის ჩატარებას.

ახლა კი, ადგილზე, კვალიფიციური ექიმების მეთვალყურეობით, ყველას მივეცით საშუალება, რომ კვლევები ჩაიტაროს და ჯანმრთელობაზე იზრუნოს, რადგან სიცოცხლე ყველაზე მნიშვნელოვანია ადამიანისთვის, სიცოცხლისთვის კი ჯანმრთელობაა აუცილებელი“, - აღნიშნა თამარ მურალოვამ.

გორის მუნიციპალიტეტის სოფელ ნიქოზის პირველადი ჯანდაცვის ცენტრის ხელმძღვანელის ნიკოლოზ ძამუკაშვილის თქმით, მსგავსი ტიპის ღონისძიებებს, რეგიონის მასშტაბით, პერიოდულად მართავენ და მობილური ამბულატორიული ავტომობილით ადგილზე ხდება მოსახლეობისთვის მომსახურების გაწევა.

„მოქალაქეებს ვურჩევთ და მნიშვნელოვანია, რომ დროულად ჩაიტარონ კიბოს სკრინინგი, რათა მოხდეს დაავადების დროული გამოვლენა, დიაგნოსტიკა და, შესაბამისად, მკურნალობა.

ჩვენი მიზანია, ადგილზე, დროის დაზოგვით მოქალაქეებმა კომფორტულ გარემოში, კვალიფიციური ექიმების მეთვალყურეობით შეძლონ მომსახურების მიღება“, - „გორის მაცნესთან“ აღნიშნა ნიკოლოზ ძამუკაშვილმა.