გორის მუნიციპალიტეტში მცხოვრები ახალგაზრდებისთვის ტექნოლოგიური ბანაკი მოეწყობა და STEAM SUMMER 2025-ში მონაწილეობის მისაღებად რეგისტრაცია დაიწყო.

ადგილობრივი თვითმმართველობის ინფორმაციით, პროექტში მონაწილეობას 15-დან 18 წლამდე მოზარდები შეძლებენ, რომლებიც აგვისტოს 5 დღეს (23-დან 27 აგვისტოს ჩათვლით) ბაკურიანში გაატარებენ.

გორელ ახალგაზრდებთან ერთად, ბანაკი კასპში, ქარელსა და ხაშურში მცხოვრებ მოზარდებსაც უმასპინძლებს.

ბანაკი - STEAM SUMMER 2025 - კასპის ტექნოპარკის, საქართველოს ინოვაციების და ტექნოლოგიების სააგენტოს დაფინანსებით და კასპის, გორის, ქარელის და ხაშურის მუნიციპალიტეტების თანადაფინანსებით იმართება და ღონისძიების ორგანიზატორების ინფორმაციით, პროექტი შიდა ქართლის რეგიონში მცხოვრები ახალგაზრდების STEAM დარგებით დაინტერესებას ისახავს მიზნად.

„ბანაკის ფარგლებში მონაწილეები გაერთიანდებიან 2-4 კაციან ჯგუფებში და მენტორების, მოწვეული ტრენერების და გუნდის ლიდერების დახმარებით, შეიმუშავებენ ინოვაციურ იდეებს, გაივლიან ინტენსიურ ტრენინგებს სხვადასხვა მიმართულებით, რაც დაეხმარებათ პოტენციალის სრულად რეალიზებაში. ბანაკის ბოლო დღეს კი წარმოადგენენ პროექტებს ფართო აუდიტორიის წინაშე“, - აცხადებენ ორგანიზატორები.

გორის მუნიციპალიტეტის მერია პროექტს „ახალგაზრდული პროექტების თანადაფინანსების პროგრამის“ ფარგლებში აფინანსებს.

დაინტერესებულ პირებს ბანაკში მონაწილეობისთვის რეგისტრაციის გავლა შეუძლიათ გორის მუნიციპალიტეტის მერიის ოფიციალურ ფეისბუქგვერდზე გამოქვეყნებულ სარეგისტრაციო ბმულზე.