31 ივლისი რეინჯერის მსოფლიო დღეა. საქართველოში რეინჯერთა პროფესიული დღე 2017 წლიდან აღინიშნება და მიზანი იმ რეინჯერთა სამსახურის დაფასებაა, რომლებიც საკუთარი ჯანმრთელობისა და, რიგ შემთხვევაში, ქვეყნის ბუნებრივ საგანძურს და კულტურულ მემკვიდრეობას სიცოცხლის ფასად იცავენ.

გარემოს დაცვისა და სოფლის მეურნეობის სამინისტროს ინფორმაციით, საქართველოს დაცული ტერიტორიების 25 ადმინისტრაციულ ერთეულში 500-მდე რეინჯერი მსახურობს. რეინჯერები უზრუნველყოფენ როგორც ბუნების დაცვას, ასევე, ვიზიტორთა უსაფრთხოებას და მათ ინფორმირებას. რეინჯერები, ასევე, ჩართულნი არიან კვლევის და მონიტორინგის პროცესში, მონაწილეობენ ხანძრების პრევენციასა და ბრაკონიერობის წინააღმდეგ ბრძოლაში.
„2025 წლის რეინჯერების მსოფლიო დღის  თემა „რეინჯერები - გარდამტეხი კონსერვაციის ენერგია“  ხაზს უსვამს რეინჯერების მნიშვნელოვან როლს გლობალურ კონსერვაციულ ძალისხმევაში, მათ შორის, გლობალური ბიომრავალფეროვნების ჩარჩოს მესამე მიზნის მიღწევაში, რომელიც გულისხმობს პლანეტის 30%-ის დაცვას 2030 წლისთვის.  აღნიშნული თემა ემთხვევა 2025 წელს დაგეგმილ IUCN-ის მსოფლიო კონსერვაციის კონგრესს, რაც კიდევ უფრო აძლიერებს რეინჯერების პროფესიის გლობალურ მნიშვნელობას და საჭიროებას მათი მხარდაჭერისა და აღიარებისთვის“, - აღნიშნავენ გარემოსდამცველები.

რეინჯერის მსოფლიო დღე - 31 ივლისი, რეინჯერთა საერთაშორისო ფედერაციამ (IRF) 2007 წელს დააფუძნა.

აღსანიშნავია, რომ გორის მუნიციპალიტეტის განვითარების სააგენტოს ტანისა და თეძმის დაცული ლანდშაფტის განყოფილებაში „რეინჯერის ბიბლიოთეკა“ ფუნქციონირებს. ბიბლიოთეკის წიგნადი ფონდი გარემოს დაცვაზე, ეკოტურიზმზე, კულტურულ მემკვიდრეობასა და ტრადიციულ საქმიანობებზე, ბიომრავალფეროვნებასა და ბუნების მონიტორინგზე არსებულ ლიტერატურას მოიცავს, რაც ხელს უწყობს რეინჯერების ცნობიერების ამაღლებას გარემოს დაცვის საკითხებზე.