გორის მუნიციპალიტეტის მერიის თანადაფინანსებით, შეზღუდული შესაძლებლობების მქონე პირებმა, სამშვიდობო მისიებში დაჭრილმა ჯარისკაცებმა, ომის ვეტერანებმა და ონკოსაზოგადოების წარმომადგენლებმა მშვილდოსნობის და ჯომარდობის ჩემპიონატებში მიიღეს მონაწილეობა.

აქტივობა პროექტის - „აქტიური ცხოვრება ჩემი სტიქიაა“ ფარგლებში განხორციელდა. ღონისძიებას ბორჯომის ადაპტირებულმა საველე ბანაკმა უმასპინძლა და 100-მდე ბენეფიციარი ჩაერთო.

გამარჯვებულ გუნდებს მედლები, თასები და სიგელები გადაეცათ, ჯომარდობის ჩემპიონატში გამარჯვებულები კი ფულადი პრიზებით და საჩუქრებით დაჯილდოვდნენ.

„ღონისძიება „საქართველოს ახალგაზრდული მედია კავშირის” ინიციატივით, ვეტერანების საქმეთა სახელმწიფო სამსახურის, მუნიციპალიტეტების მერიებისა და სპონსორების მხარდაჭერით მოეწყო. პროექტის განხორციელება ხელს უწყობს საქართველოს მიერ რატიფიცირებული გაეროს 2006 წლის შეზღუდული შესაძლებლობის მქონე პირთა უფლებების დაცვის კონვენციის 30 - ე მუხლის იმპლემენტაციას და შშმ პირთა მიმართ დამკვიდრებული სტერეოტიპების მსხვრევას“, - აღნიშნულია ინფორმაციაში, რომელსაც გორის მუნიციპალიტეტის მერია ავრცელებს.