ერთიანი ეროვნული გამოცდები ხვალიდან, 3 ივლისიდან დაიწყება. პირველ გამოცდას აბიტურიენტები ქართულ ენასა და ლიტერატურაში ჩააბარებენ.

გამოცდების ეროვნული ცენტრის ინფორმაციით, საგნისა და სპეციალური მასწავლებლის გამოცდებზე დარეგისტრირებულები საგამოცდო პროცესში 8 ივლისიდან ჩაერთვებიან. 10 ივლისს ჩატარდება სტუდენტთა საგრანტო კონკურსი. რაც შეეხება მაგისტრანტობის კანდიდატებს, საერთო სამაგისტრო გამოცდას 21 და 22 ივლისს ჩააბარებენ.

გასული წლების მსგავსად, საგამოცდო ცენტრები გაიხსნება: თბილისში, გორში, ბათუმში, ზუგდიდში, ქუთაისში, ფოთში, ახალციხეში, ოზურგეთში, რუსთავში, თელავში, ხულოსა და ამბროლაურში.

2025 წელს ერთიანი ეროვნული გამოცდებისთვის 80 000-ზე მეტი აბიტურიენტი დარეგისტრირდა. ერთიანი ეროვნული გამოცდები 22 ივლისს, სახვითი და გამოყენებითი ხელოვნების გამოცდით დასრულდება.