გორის „დილას“ ახალი მწვრთნელი ჰყავს. მთავარი მწვრთნელის პოზიციაზე 49 წლის იტალიელი სპეციალისტი დიეგო ლონგო დაინიშნა.

საფეხბურთო კლუბის მიერ გავრცელებული ინფორმაციით, „დილაში“ გადმოსვლამდე ლონგო იტალიის სერია C-ს კლუბ „სესტრეს“ წვრთნიდა. მანამდე კი ალბანურ კლუბებში - „ტეუტაში“, „ფლამურტარში“ და „კუკესში“ მთავარი მწვრთნელის თანამდებობა ეკავა. გარდა ამისა, კიევის „დინამოში“ საუდის არაბეთის „ალ ჰილალში“ და ბერძნულ „პაოკში“ მთავარი მწვრთნელის ასისტენტად მუშაობდა. დიეგო ლონგოს სანაკრებო გამოცდილებაც აქვს, 2009-2011 წლებში რუმინეთის ეროვნული ნაკრების სამწვრთნელო შტაბის წევრი იყო.

შეგახსნებთ, გორის „დილას“ მთავარი მწვრთნელის პოსტს რიკარდო კოშტა იკავებდა. როგორც კლუბში აცხადებენ, პორტუგალიელმა სპეციალისტმა თანამდებობა ოჯახური მიზეზების გამო დატოვა.