1989 წლის 9 აპრილის ტრაგედიიდან 36 წელი გავიდა.

გორში, ხელისუფლების და საზოგადოების წარმომადგენლები, ტრადიციულად, მემორიალთან შეიკრიბებიან და გარდაცვლილთა ხსოვნას პატივს მიაგებენ.

9 აპრილის სახელობის სკვერში, 12:00 საათზე, ტრადიციულად, გარდაცვლილთა სულების მოსახსენიებელი პანაშვიდი ჩატარდება.

1989 წლის 9 აპრილს, გამთენიისას, საბჭოთა კავშირის შეიარაღებული ძალების დანაყოფებმა თბილისის ცენტრში, პარლამენტის შენობასთან, მშვიდობიანი საპროტესტო აქცია დაარბიეს, რასაც მსხვერპლი მოჰყვა.

დარბევის შედეგად 21 ადამიანი დაიღუპა. პარლამენტის წინ შეკრებილი ათასობით მოქალაქე კი გაურკვეველი შემადგენლობის გაზით მოიწამლა.

სისხლიანი ტრაგედიიდან ორი წლის შემდეგ ჩატარებული რეფერენდუმის საფუძველზე, 1991 წლის 9 აპრილს, იმჟამინდელმა უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა.