გორის მუნიციპალიტეტის სოფელ ტყვიავში სპორტული მოედნის რეაბილიტაცია მიმდინარეობს.

ადგილობრივი თვითმმართველობის ინფორმაციით, პროექტის ღირებულება 167 776 ლარია და მოედნის სარეაბილიტაციო სამუშაოები „სამოქალაქო ბიუჯეტი 2024“-ის ფარგლებში ხორციელდება.

რაც შეეხება შესასრულებელ სამუშაოებს, პროექტის მიხედვით მოეწყობა ხელოვნური საფარი, ღობე, კალათბურთის ფარები და ფეხბურთის კარები, ასევე, დამონტაჟდება განათება.

შეგახსენებთ, პროგრამა „სამოქალაქო ბიუჯეტი 2024“-ის ფარგლებში, გორის მუნიციპალიტეტში არაერთი ინფრასტრუქტურული პროექტი ხორციელდება. „სამოქალაქო ბიუჯეტის“ მიზანია მუნიციპალურ პროცესებში მოქალაქეთა ჩართულობის ზრდის ხელშეწყობა და ადგილობრივი ბიუჯეტის მათი ინტერესების გათვალისწინებით განაწილება.