საზოგადოება
04.09.2024 11:28
ბორჯომის ხეობაში გაჩენილი ხანძრის ქრობის სამუშაოებში დილიდან 4 ვერტმფრენი ჩაერთო
ბორჯომის ხეობაში, ახალდაბის მიმდებარედ ტყეში გაჩენილი ცეცხლის ქრობის პროცესში დღეს დილიდან სასაზღვრო პოლიციის 4 ვერტმფრენი ჩაერთო, - ამის შესახებ ინფორმაციას შინაგან საქმეთა სამინისტროს საგანგებო სიტუაციების მართვის სამსახური ავრცელებს.
უწყების ინფორმაციით, რთული რელიეფის გამო, ხანძრის კერასთან სახანძრო-სამაშველო ტექნიკის შეყვანა ვერ ხერხდება.
ხანძრის ქრობის პროცესში, სამცხე-ჯავახეთის, შიდა ქართლის და თბილისის სახანძრო-სამაშველო განყოფილებების 150 მეხანძრე-მაშველი და გარემოს დაცვისა და სოფლის მეურნეობის სამინისტროს დაცული ტერიტორიების სააგენტოს ბორჯომ-ხარაგაულის ეროვნული პარკის რეინჯერები არიან ჩართულები.
საგანგებო სიტუაციების მართვის სამსახურის მიერ სპეციალური საველე შტაბი მოეწყო, საიდანაც ტყის ხანძრის ქრობის სამუშაოების კოორდინაცია მიმდინარეობს, ხანძრის მონიტორინგი ხორციელდება დრონების საშუალებით.
