გორის „დილას“ მთავარი მწვრთნელის პოზიციაზე 46 წლის ლევან კორღალიძე დაინიშნა.

კლუბის ადმინისტრაციის ინფორმაციით, 2013-2014 წწ. სეზონზე კორღალიძე „დილას“ ღირსებას ფეხბურთელის რანგში იცავდა.

რაც შეეხება სამწვრთნელო კარიერას, ახლადდანიშნული სპეციალისტი თავდაპირველად თბილისის „ლოკომოტივში“ მთავარი მწვრთნელის ასისტენტის პოზიციაზე მუშაობდა, რის შემდეგაც გუნდის მთავარ მწვრთნელად დაინიშნა. არაერთხელ ეკავა მთავარი მწვრთნელის პოზიცია „იბერიაშიც“ და გუნდს როგორც საქართველოს ჩემპიონის, ასევე საქართველოს თასის გამარჯვებულის ტიტული მოუტანა. აღსანიშნავია, რომ 2023-2024 წწ. სეზონში კორღალიძე ყაზახური ,,ჟენისის" მთავარი მწვრთნელიც იყო.

„ძალიან დიდი პატივია, ვიყო ისეთი წარმატებული გუნდის მთავარი მწვრთნელი, როგორიც გორის „დილაა“.

მადლობა ხელმძღვანელობას ნდობისთვის. ჩვენი ამბიციები ერთმანეთს დაემთხვა და დიდი მოტივაციით მოვედი. „დილას“ თამაშებს ყოველთვის ვუყურებდი და ძალიან მომწონდა ის შემტევი სტილი, რაც ამ გუნდს ჰქონდა. რა თქმა უნდა, ხარვეზები ყველა გუნდს აქვს, როგორი კარგი გუნდიც არ უნდა იყოს. ყველაფერს გავაკეთებთ, რომ ეს ხარვეზები რაც შეიძლება მალე აღმოვფხვრათ.

არ ვარ მომხრე, რომ გუნდში რაიმე რადიკალურად შევცვალოთ, „დილა“ ისედაც ბოლო წლების ერთ-ერთი წარმატებული გუნდია. ვეცდები, ამ წარმატებას პატარ-პატარა დეტალები შევმატო.

რაც შეეხება ევროტურნირებს, მე არასდროს მრცხვენია იმის აღიარება, რომ ჩემი გამოცდილება არ იყო პოზიტიური, მაგრამ წარმატება წარუმატებლობის გარეშე არ მოდის. ვფიქრობ, არამარტო ჩვენ, არამედ შარშანდელი ევროტურნირების მონაწილე ყველა გუნდი გავაკეთებთ სწორ დასკვნებს, რომ წელს მეტად წარმატებულნი იყვნენ ქართული კლუბები“, - განაცხადა ლევან კორღალიძემ.

შეგახსენებთ, გორის „დილას“ მთავარი მწვრთნელის პოსტს დიეგო ლონგო იკავებდა. როგორც კლუბში აცხადებენ, იტალიელმა სპეციალისტმა თანამდებობა ორხრივი შეთანხმების საფუძლველზე დატოვა.